Xabier Gullón e - kulturaraba

Gasteizen jaio zen, 1997an. Klarinete ikasketak egin zituen Isaac Rodríguezekin Bartzelonan eta Olivier Patey-rekin Hagan, eta kalifikazio gorenak lortu zituen. Gaur egun klarinete akademista da Londresko Southbank sinfonian.

 

Deutsche Grammophone ospetsuko kritikarien arabera, "izugarri bertutetsua da, eta zur eta lur, arnasarik gabe, uzten zaitu pianissimo magiko batzuekin". Bere ibilbidean hainbat sari eta aintzatespen lortu ditu, hala nola lehenengo saria bai Bartzelonako XIX. Cicle de Primavera lehiaketan, bai Higini Anglés Nazioarteko XIII. Ganbera Lehiaketan. Hala 2017an, nola 2018an, kanporatze faseen ondoren, Ferrer-Salat musika fundazioak ematen duen bikaintasun bekaz saritua izan zen, eta 2019an Fundació Conservatori Liceu-k beka osoa eman zion master ikasketak egiteko. 2022an, Yamaha Music Europe Foundation ospetsuak bere beka bakanetako bat eman zion, haren talentua aitortuz, eta 2023an, Royal Concertgebouw Orchestrak W. Mengelberg beka eman zion.

 

Bakarlari moduan aritu da hainbat aldiz bai Gasteizko Udalaren Musika Bandarekin, bai EIO Gaztearekin, Euskal Herrian, eta Ensemble Liceu XXI-ekin Katalunian, eta J. Cañizaresen “Dance Movement” klarinete eta orkestrarako kontzertua estreinatu zuen.

 

Ganbera musikaren arloan, nazioarteko hainbat ziklo eta musikalditan aritu da. Nabarmentzekoak dira, besteak beste, Pablo Casals musika jaialdia (Frantzia), Davos Festival (Suitza), Rencontres Musicales de Méditerranée (Kortsika), Festival Emergents (Bartzelona) eta Fringe Festival (Torroella de Montgrí). Maila goreneko orkestra interpreteen ondoan aritzen da aldizka, hala nola hauetan: Parisko Orchestre, Parisko Orchestre de l 'Opera, Mozarteum Orchester Salzburg, Brussels Philharmonic, Ensemble Intentercontemporain, Statskapelle Dresden...

 

Gaur egun, Southbank sinfoniako eta Verbier Festival Orchestra-ko kidea da, eta Mahler Chamber Orchestra ospetsuaren akademista ere izan zen 2020/21 denboraldian. JONDE Espainiako Orkestra Nazionaleko kide da 2021az geroztik, eta ohiko kolaboratzailea Vallès-eko orkestra sinfonikoan, Gran Teatre del Liceu-ko orkestra sinfonikoan eta Luxembourg Kammerorchester-en. JONC Jové Orquestra Nacional de Catalunya-ko kide titularra izan zen, eta Suitzako Davos Festival jaialdiko akademista, Animato Foundation-en bekaren bidez.

 

Bere bizitza profesionalaren zatirik handiena interpretazioari eskaini dion arren, noizean behin eskola magistralak ere ematen ditu, praktikatzean eta interpretatzean kontzentrazioa sustatzeko ikasketa metodoak partekatzeko. Izan ere, arlo horri buruzko ikerketa egin zuen Koninklijk Conservatorium Den Haag-en prestakuntza jasotzen ari zen bitartean. Musikaren arloko merezimenduez gain, Xabier jariotasunez mintzatzen da euskaraz, gaztelaniaz, katalanez, ingelesez, frantsesez, alemanez eta italieraz.

 

Arte eszenikoen eta musikalen arloko prestakuntza-bekak 2023 itzuli