MUSIKARTA. Musika kartetan erakusketa urriaren amaiera arte ikusgai egongo da, eta Arabako Fournier Karta Museoko bildumako gai edo eduki musikalekin lotutako karta sortak erakutsiko ditu.

 

Kartak giza kulturaren parte izan dira mendeetan zehar, eta jolasteko eta entretenitzeko objektu izateaz gain, beste istorio eta eduki batzuen eramaileak ere izan dira. Erakusketa hau musikak eguneroko bizitzan izan duen eraginaren beste adibide bat da, era guztietako artelan eta objektuetan irudikatzera iritsi baita, baita kartetan ere.

Erakusketa hau prestatzeko, fabrikatzaile eta herrialde ezberdinetako 60 karta sorta baino gehiago erabili dira, batez ere europarrak. Karta sorten antzinatasunari dagokionez, XVIII. mendetik XXI. mendera bitarteko aleak aurkezten dira. Zaharrena Londresen egin zen 1775 inguruan, eta modernoena ASESCOINek (Asociación Española de Coleccionismo e Investigación del Naipe delakoak) argitaratutako 2022ko karta sorta bat da.

 

Karta fabrikatzaileak kezkatuta agertu ziren eta balio handia eman zioten diseinuari kartetan. Horretarako, artistak zituzten plantillan, edo enkargu zehatzak egiten zizkieten diseinatzaileei kartasortak egiteko. Beraz, ez dira soilik jokorako karta sorta arruntak, baizik eta, batzuetan, formatu txikiko benetako artelanak.

Erakusketa honetan musika da benetako protagonista. Musika hainbat modutan islatzen da, sinboloen eta musika-tresnen irudikapenetik hasi eta musika sortu eta interpretatzen dutenen erretratuetaraino. Beste ale batzuk kontzeptuak ikasteko musika edukiekin, musika notazioarekin eta aipatutako gaiarekin lotutako beste elementu batzuekin ilustratzen dira, kartak hezkuntza baliabide gisa ere erabil baitaitezke.

 

Antzeztutako obra musikalen artean, sinfoniez eta kontzertuez gain, opera lanak, balleta edo antzerki musikala nabarmentzen dira, genero eszeniko gisa edo musika dramarekin, emanaldiarekin eta dantzarekin uztartzen diren antzezpen gisa. Karta sorta horietako batzuetan operetan protagonista diren pertsonaia historikoak edo literarioak, publikoak gehien ezagutzen dituen eszenak eta libretoaren zatiak ere agertzen dira.

Musika klasikoaren mende batzuen ondoren, XX. mendeak generoen eta estiloen berrikuntza handia ekarri zuen. Soinu berriak eta askotarikoak sortu ziren, jazza, rocka eta popa, musika elektronikoa edo hip-hopa. Bildumako karta batzuk ere aukeratu ditugu estilo horiek irudikatzeko.