OHARRA: Gonbidapena duten pertsonei sartzeko ateak ekitaldia hasi baino bost minutu lehenago itxiko dira, eta une horretan sarrerak baliorik gabe geratuko dira. Leku librea izanez gero, gonbidapenik gabe sartzeko aukera izango da edukiera bete arte.

Larunbat musikalak formatu txikiko kontzertu eta ekitaldien zikloa da, antzinako musika, musika klasikoa, garaikidea, zarzuela eta beste kultura batzuetako musika errepertorioak barne hartzen dituena. 

2025ko Larunbat musikalen programazioak talentu gazteari bultzada eman nahi dio publiko berriak erakartzeko. Zikloak martxoan Arte Ederren Museoan Claudia Besné aurkeztuko digu. 

EMAKUME KONPOSITOREAK

1975ean, aurrekaririk gabeko ospakizun batean elkartu zen mundua, Emakumearen Nazioarteko Urtea aldarrikatu zuenean. Gizartearen esparru guztietan emakumeen eskubideen, berdintasunaren eta ahalduntzearen onarpen globaleko urtea izan zen. Aldaketa eta aurrerapen testuinguru horretan, musikak ere berebiziko garrantzia izan zuen, eta mundu osoko emakumeen esperientziak, borrokak eta garaipenak adierazteko bitarteko gisa balio izan zuen.

Aurten inflexio puntu handi honen 50. urteurrena betetzen da. Horregatik, programa honekin bere garaiko arau sozial eta kulturalak desafiatu zituzten emakumeei omenaldia egin nahi diet, musika emantzipaziorako eta inspiraziorako tresna gisa erabiliz.
Programa honek hainbat estilo, garai eta kulturatako harparako piezak aurkezten ditu, entzuleei esperientzia musikal anitza eta zirraragarria eskainiz.
Claudia Besné
 

Claudia Besné

PROGRAMA

Emakumearen Musika Ondarea ospatzen
Celebrando el Legado Musical de la Mujer
Caroline Lizotte (1969) - Suite Galactique, op. 39
I.    Exosphère
II.    Hymne au Bon Combat
III.    Scherzo del pueblo
Fanny Mendelsohn (1805-1847) - Melodie nº 2, op.4
Germaine Tailleferre (1892-1983) - Sonata pour Harpe
I.    Allegretto
II.    Lento
III.    Perpetuum Mobile
Sophia Dussek (1775 -1831) - Sonata C minor
I.    Allegro Moderato
II.    Andantino
III.    Rondo Allegro
Şirin Pancaroğlu (1968) - The cry of the Flamingos Henriette Renié (1875- 1956)

- Pièce symphonique

Claudia Besné 

Donostian (Espainia) jaio zen, 1997an. Francisco Escudero kontserbatorioan hasi zituen musika ikasketak, eta, hurrengo urteetan, Baionako (Frantzia) Maurice Ravel kontserbatorioan ere ikasi zuen. Denbora horretan, sari nazional ugari jaso zituen, eta Petites Mains Symphoniques orkestrako kide izan zen (2014-2016). 2015ean, Mozarteum Salzburg unibertsitatean (Austria) onartu zuten, eta 2020ko ekainean graduatu zen, atera ahal zen kalifikaziorik altuena lortuta, aho batez. 2023ko ekainean, Interpretazio Masterraren titulua eskuratu zuen bertan. Gainera, UNIReko Pedagogia Musikaleko Maisutza lortu zuen 2022an.

Bere ibilbidean zehar, hainbat aintzatespen jaso ditu, besteak beste, Nicanor Zabaleta Beka ospetsua, Becas Ch de Estudio eta Harpako Esloveniako Elkartearen Nazioarteko 60. Lehiaketaren 3. saria.

Bakarlari gisa, Donostiako Musika Hamabostaldia eta Noia Harp Fest (2023) nazioarteko jaialdietan parte hartu du, besteak beste, eta MusaE (2022 eta 2023) eta Musiklasik (2024) zikloetan parte hartu du. Andres Egiguren orkestrarekin ere lankidetzan aritu da, Aita Madinaren Harpa eta Orkestrarako kontzertua estreinatuta 2022ko azaroan, eta askotan interpretatu ditu Händelen harparako Kontzertua eta Vivaldiren Kontzertua rv93, ganbera orkestrarekin. 2023ko urtarrilean, musikari gonbidatua izan zen Gazteentzako Norvegiako Musika Lehiaketako sariak banatzeko ekitaldian (Oslo, Norvegia), EMCYk gonbidatuta.

Gaur egun, Interpretazioko graduondoa egiten ari da Mozarteum Unibertsitatean, Beca Ch de Estudios-en laguntza ekonomikoari esker. Philharmonie Salzburg-eko kidea ere bada, Espainiako Orkestra Nazional Gaztearen kidea (JONDE), Salzburgoko Live Music Now ongintzako erakundean musikari aktiboa, eta Malmöko operan (Suedia) harpa jotzaile nagusi gisa laguntzen du.
Musikako jakitunek jotzaile bikain eta sentikor gisa deskribatua, guztiz musikala, musika tresna oso ondo menderatzen duena eta, gaztea izan arren nazioartean proiekzio handia duena, Claudia Besné zenbait orkestrarekin lankidetzan aritzen da, hala nola Malmöko opera, Rioja Filarmonía eta Austriako Orkestra Sinfoniko Femeninoa, bai eta ganbera musikako taldeak ere, BOREAL duoko kidea izanik Eva Calvo gitarristarekin, bai eta NUMEA duoko kidea ere, Olmo Álvarez flautistarekin.