Kontzertu hau Arabako Musika Klasikoaren Zikloaren parte da. Arabako Foru Aldundiko Kultura eta Kirol Sailak antolatutako ziklo honek urtez urte musika klasikoa lurraldeko hainbat herritara eramatearen aldeko apustua egiten du.

25 urtetik gorako ibilbidea duen musika ziklo hau, 2011tik, "Donostiako Musika Hamabostaldia"rekin lankidetzan ospatzen da, eta horrek lehen mailako interpreteen kartela ziurtatzen du. Arrakasta hau, gainera, udalerri parte-hartzaileek kontzertu bakoitzaren antolakuntzan eta garapenean duten funtsezko inplikazioari esker borobiltzen da.

Aurtengo edizioan 6 kontzertu eskainiko dira, Arabako kuadrilletan banatuta. 2026ko Arabako Musika Klasikoaren Zikloa abuztuan zehar izango da Done Bikendi Harana, Iekora, Argantzon, Berganzo, Zalduondo eta Aramaio herrietan.

• Edurne Ruiz, mezzosopranoa 
• Iñar Sastre, pianoa

“Falla 150: entre maestros, amigos y herederos”
Falla, Granados, Ginastera, Ravel, García Lorca eta Pedrellen lanak

 

FALLA 150: MAISUEN, LAGUNEN ETA ONDORENGOEN ARTEAN

Manuel de Fallaren jaiotzaren 150. urteurrena dela eta, programa honek konpositorearen bizitzan zeharreko musika-bidaia bat proposatzen du, haren eraldaketa estetikoa markatu zuten hiri, maisu eta artisten bitartez. Pianoak eta ahotsak elkarrekin dialogatzen dute Fallak soinu-nortasun berri bat nola eraiki zuen azaltzeko: bere gaztaroko espainiar herri-musikatik hasi, Parisko modernitatetik igaro, eta Argentinako erbestealdiaren oihartzun nostalgikoarekin amaitu arte.

Programaren ardatza Siete canciones populares españolas (Zazpi euskal/espainiar herri-kanta) dira, bere ahots-ziklorik enblematikoena. Hauek jaso zituen eraginen testuinguruan aurkezten dira, bai inspirazio-iturri izan zituen obrekin, bai haren ondarea jarraitu zutenekin lotuz.

• Erroak: berezko hizkuntza baten sorkuntza

Felipe Pedrellekin jasotako prestakuntzak musika modernoak herri-tradiziotik jaio behar zuela sinetsarazi zion Fallari. Pedrellengandik jaso zuen folklorearen ikuspegi zorrotza eta herri-musika bere esentzia galdu gabe eraldatzeko konpromisoa.

Enrique Granadosekiko adiskidetasunak sentsibilitate hori sendotu zuen. Granadosek, jada espainiar musikaren erreferente gisa finkatuta zegoela, Parisera bidaiatzera animatu zuen Falla, eta bere Tonadillas lanekin inspiratu zuen; eredu erabakigarria izan zen haren ahots-idazkerarako.

• Paris: modernitatearen aurkikuntza

Frantziako hiriburuan, Fallak aliatu artistiko bat aurkitu zuen Maurice Ravelgan. Bien arteko trukeak ahotsaren tratamendua findu zuen euren obretan, eta gardentasuna, intimitatea eta kolore-zentzu berri bat ekarri zituen. Fallak egizko izaera hispaniarra jarri zuen; Ravelek, aldiz, modernitatea. Bien arteko zubiak definitu zuen Siete canciones populares españolas (1914–1915) zikloan islatzen den estetika.

• Granada: poesia, folklorea eta konpromisoa

Falla Granadara iristeak Federico García Lorcarekiko adiskidetasun sakon baten hasiera markatu zuen. Elkarrekin defendatu zuten Andaluziako herri-artea, eta Cante Jondo Lehiaketa historikoa antolatu zuten (1922). Lorcaren ikuspegi poetiko eta herrikoiak Fallaren irudimena zabaldu zuen bere aldirik introspektibo eta argitsuenean.

• Argentina: erbestea eta ondarea

Argentinako erbestealdiak Latinoamerikako konpositore gazteen erreferente gisa kokatu zuen Falla. Horien artean dago Alberto Ginastera, tradizioaren eta abangoardiaren arteko uztarketa perfektua aurkitu zuena Fallaren ereduan. Bere Cinco canciones populares argentinas lanak oihartzun transatlantiko gisa dialogatzen dute Fallaren kantekin.

 

Egitaraua:

Felip Pedrell (1841–1922)
La primavera, op. 106
La primavera que a estimar convida
Mirant d’una viola
Si les floretes de ta finestra
Enrique Granados (1867–1916)
Tonadillas en estilo antiguo
Amor y odio
Callejeo
El mirar de la maja
Federico García Lorca (1898–1936)
Canciones españolas antiguas
Las morillas de Jaén
Los cuatro muleros
La Tarara
 Zorongo
Maurice Ravel (1875–1937)
Cinq mélodies populaires grecques
Le réveil de la mariée
Là-bas, vers l’église
Quel galant m’est comparable ?
Chanson des cueilleuses de lentisques
Tout gai !
Iñar Sastre (1986)
Homenaje a Falla
Manuel de Falla (1876–1946)
Siete canciones populares españolas
El paño moruno
Seguidilla murciana
Asturiana
Jota
Nana
Canción
Polo
Alberto Ginastera (1916–1983)
Cinco canciones populares argentinas
Chacarera
Arrorró
Gato

 

EDURNE RUIZ

Gasteizen jaiotako Edurne Ruiz Garcia mezzosopranoak Róterdamgo Goi Mailako Kontserbatorioan (Herbehereak) egin zituen kantu-ikasketak, Charlotte Riedijken eta David Bollen, Maarten Hillenius eta Amy Chang pianisten tutoretzapean. Zentro berean, interpretazio-eskolak jaso zituen Margreet Honig, Henk Neven eta Marcel Reijansen eskutik, eta Lied espezializazioko eskolak Daan Boertienek eta Jan Willem Paschierrek zuzenduta.

2024an, Netherlands Bach Society ensemble barrokoko Akademiaren kide gisa hautatu zuten (talde horrekin abestu ohi du), eta 2025ean Jordi Savallen Capella Realko kide gisa. Urte berean, Doelen Ensemble musika garaikideko taldearekin ere lan egin zuen mezzosoprano nagusi gisa. Era berean, Herbehereetako abesbatza profesionalekin abesten du erregularki, hala nola Herbehereetako Irratiko Abesbatzarekin eta Laurens Collegiumekin.

Hainbat kontzertutan parte hartu du solista gisa repertorio klasikoko obrak interpretatuz, besteak beste: Haendelen Mesias, Vivaldiren Gloria, Pergolesiren eta Dvoráken Stabat Mater, Mozarten eta Durufléren Requiem, Bachen Pasioa San Mateoren arabera edota Rossiniren Petite Messe Solenelle. Errepertorio operistikoari dagokionez, Dorabellaren rola interpretatu du Cosí fan Tutte operan, Sorgina Dido eta Eneas lanean eta Ernesto Il Mondo della Luna operan.

Azken urteotan, Serena Saenz, Anna Ollet, Marcel Boone, Christiane Karg, Isabel Poulenard, Ulrike Hofbauer eta Rubén Fernandez Aguirre bezalako abeslari eta pianisten aholkuak jasotzeko aukera izan du. Era berean, Lorenzo Viotti, Klaus Mäkelä, Anja Bihlmaier, Lahav Shani, Richard Egarr edota Hans-Christoph Rademann bezalako zuzendariekin egin du lan, eta agertoki hauetan abestu du: Amsterdamgo Concertgebouw, Róterdamgo De Doelen, Bayreuthgo Festspielhaus, Bilboko Euskalduna Jauregia, Donostiako Kursaal Auditorioa, Gasteizko Principal Antzokia eta Iruñeko Baluarte Auditorioa.

Ganbera-musikarekiko eta kanta-errepertorioarekiko duen interesaren ondorioz, Mireia Costa biolin-jotzailearekin eta Damiën Hemskerk zein Irene Martinez de las Muelas pianistekin ere lan egiten du. Haiekin batera, Zeisteko (Herbehereak) Lied Jaialdiak, Vrienden van het Lied erakundeak eta Róterdamgo Société d’Harmonie elkarteak antolatutako kontzertuetan parte hartu du.

IÑAR SASTRE

Iñar Sastre euskal pianista bat da, eta bere ibilbidean interpretazioa eta sorkuntza uztartzen ditu, inprobisaziorako eta diziplinarteko elkarrizketarako sentsibilitate nabarmenarekin. Piano-ikasketak Musikenen egin zituen eta inprobisazioan espezializatu zen Parisko Conservatoire National Supérieur de Musique eskolan. Bere jarduera artistikoak musika klasikotik hasi eta jazza barne hartzen ditu, eszena eta ikus-entzunezkoen akonpanamendutik igaroz.

Hamar album baino gehiago argitaratu ditu, besteak beste: Dialogues: Improvisations on Beethoven, Improvisations after Prokofiev, Arineketan edo Pasieran. Nazioarteko aretoetan jo du, hala nola New Yorkeko Carnegie Hallen (Catherine Trottmann sopranoarekin batera) edota Berlinen Philharmonien (Yajie Zhang sopranoarekin batera).

Bere jarduera artistikoaren barruan sartzen dira bakarkako interpretazioa, ganbera-musika, eszena-akonpanamendua eta musika-sorkuntza. Pianista gisa parte hartu du N.A.N., Zehar edo La Tarara bezalako eszena eta ikus-entzunezko proiektuetan, bai eta dantza-konpainiekin egindako elkarlanetan ere (Kukai Dantza edo Haatik dantza). Zine mutua zuzenean laguntzen du Parisko hainbat aretotan, hala nola Cinémathèque Française, Fondation Pathé-Seydoux edo Forum des Images espazioetan. Inprovisatzaile giga ere aritu da France Musique irratian eta Poulenci buruzko nazioarteko biltzarrean.

Konpositore gisa, musika sortu du dokumentaletarako, dantza-ikuskizunetarako eta tresna-obretarako (adibidez, Irriken paisaia). Moldaketak ere egin ditu Bilboko Txistulari Banda Munizipalerako edota Et Incarnatus Orchestrarako.

Iñar Sastreren ibilbidean hitzaldiak, sari-banaketak eta diziplinarteko errezitaldiak ere badaude, Joseba Sarrionandia edo Kirmen Uribe bezalako idazleekin elkarlanean.

2017an, konposatutako abesti onenaren Laboa Katedra Saria jaso zuen, eta 2021ean eta 2025ean Musika Bulegoa Saria, zuzeneko onenari eta Zaharrak Berri diskoari dagokionez, hurrenez hurren, bere Arineketan taldearekin batera.

Gaur egun, irakaslea da Musikenen (Euskal Herriko Musika Ikastegi Nagusian).