AITZINA FOLK JAIALDI SOLIDARIOA - 2023

Aitzina Folk Jaialdi Solidarioaren XI. edizioak (2023) berritasun ugari dakartza: publiko guztientzako 20 kontzertu eta jarduera baino gehiago; sei disko berriren aurkezpena; talde berrien eta finkatuen emanaldiak, emakume artistei babes berezia emanez; haurrentzako jarduerak, kalejira eta guzti; topaketak folk eskoletako ikasleekin; zazpi prestakuntza lantegi, nazioarteko presentzia interesgarriarekin.

Kontzertuak eta lantegiak azarotik abendura bitartean egingo dira, Gasteizko hainbat agertokitan, eta, lehen aldiz, Arabako Izarra herrian bi jarduera egingo dira. Sarrerak dagoeneko salgai daude jaialdiaren webgunean: www.aitzinafolk.org

Patxi Villén jaialdiaren sortzaile eta zuzendariak gogorarazi duenez, "Aitzina Folk-aren hasierako helburuak duela hamar urteko berberak dira oraindik ere: musika, dantza, folka eta kultura tradizionala hedatzea, eta ataxia telangiektasiaren ikerketa bultzatzea, zeina gaixotasun arraro, genetiko, multisistemiko eta neurodegeneratiboa baita, tratamendurik eta sendaketarik ez daukana, eta desgaitasun larria eta minbizi probabilitate handiagoa eragiten duena. Euskal Autonomia Erkidegoko hiru mutili eragiten die (aurten diagnostikatu dute bat), eta Estatuko 40 haur eta gazte baino gehiagori".

Jaialdiak ematen dituen zifra garrantzitsuak ere aipatu ditu. "160 talde eta artista baino gehiago igaro dira jaialdiaren agertoki desberdinetatik aurreko hamar edizioetan, bai Euskadikoak bai nazioarteko beste eremu batzuetakoak, nola finkatuak hala gorabidean daudenak, eta 40.000 ikusle baino gehiago izan dira". Villén, musikaria eta ataxia telangiektasia duen mutil baten aita da, eta hau gogorarazi nahi izan du: "antolaketak dakarren bolumena gorabehera, jaialdi hau boluntarioekin soilik kudeatzen da hasieratik".

 

2023KO PROGRAMA

 

EMAKUMEAK FOLKEAN ETA TXIKIFOLKA

Folka hedatzen eta hazten laguntzeko, Aitzina Folk-ek euskal artisten, beste eremu batzuetako taldeen eta nazioarteko taldeen emanaldiak izango ditu, eta hura laguntza berezia ematen ari zaie lurraldeko musikariei, bai eta edozein jatorritako emakume artistei ere, emakumeen presentzia sustatuta «Emakumeak folkean» atalaren bidez.

Jaialdiko jarduerak publiko guztiei zuzenduta badaude ere, Txikifolk atalean familientzako bi kontzertu izango dituzte txikienek (Teatro Firulete antzerkia, Izarran, eta Vibra-Tó andaluziarrak, Gasteizen).

Musika Tradizionaleko eta Folk Musikako Eskolen VIII. Topaketak ere bere tokia izango du (abenduaren 16a).  Gasteizko eta Arabako eskoletako ikasle gazteenek musika partekatzeko aukera bikaina izaten da. 

 

SEI DISKO BERRIREN AURKEZPENA

Programazioa larunbat honetan, azaroak 4, aurkeztuko da, 19:00etan, Gasteizko Santa Maria katedralean, Gorka Hermosaren (akordeoia) eta Garikoitz Mendizabalen (txistua) "Sustraien Matxinada" diskoaren estreinaldiarekin. 

Gainera, Jaialdian beste bost disko aurkeztuko dituzte. Lehenengoa “Zaharrak Berri” izango da Karlos Subijana, Xuxurlaka eta Xabi Martínez Otxagabiarekin (abenduaren 1a, Izarra). 
Jaialdian aurkeztuko den bigarren diskoa Sarrabeteren “Txori Arraina” izango da (abenduaren 15a).  Zarrabetea berreskuratzeko lanean ari den taldeak egindako bigarren lan diskografikoa da eta soinu garaikidea eskaintzen du.

Jaialdian estreinatuko duten beste disko bat “Pause” izango da.  Xabier Zeberio (abenduaren 23a) biolin jotzaile bikainak bakarka egindako lehen grabazioa da. Xabier Zeberio ezaguna da Oskorri talde ospetsuko kidea izan zelako eta gaur egun Alos Quartet hari laukotean parte hartzen duelako, baina, gainera, beste hainbat kolaborazio eta proiektu egiten ditu.

Euskaditik iritsiko dira honako hauek ere: musika tresna ugari jotzen dituen Harribitxi (abenduaren 17a) bikote harrigarria; hillbilly punkeko Old Time Spooks Gasteizko taldea (abenduaren 22a), eta Munduari Begiratzeko multimedia ikuskizuna (abenduaren 27a), Kirmen Uriberen poesiarekin, Mikel Urdangarinen, Bingen Mendizabalen, Rafa Ruedaren eta Jon Cañaverasen musikarekin eta Mikel Valverderen artearekin.

Baina Aitzina jaialdiak beste eremu batzuetatik ere ekarriko du folka. Gaztela eta Leondik, adibidez, Blanca Altable biolin jotzaileak, Jesús Enrique Cuadrado “Chuchi” gitarra jotzaileak, Natalie Haas biolontxelo jotzaileak (Alasdair Fraser & Natalie Haas) eta musika tresna ugari jotzen dituen Jaime Muñozek (La Musgaña) osatzen duten B&C Quartet laukotea iritsiko da (abenduaren 16a).

Eta jaialdiari amaiera emateko, abenduaren 30ean, kontzertu bikain bat eta bi disko aurkezpen izango dira: Galiziatik Quico Comesaña iritsiko da Mãe aurkeztera (bakarrik egin duen lehenengo lan diskografikoa), eta Bizkaitik, berriz, Korrontzi, jaialdiarekiko eta haren kausarekiko beti inplikazio handia erakutsi duen talde bikaina.  20 urte beteko ditu Korrontzik 2024an, eta hori ospatzeko asmoz, sorpresaz betetako lana prestatu du: Korrontzi «20». 

Atzerritik Gasteizera etorriko direnen artean, Irlandatik iritsiko diren FullSet (azaroaren 24a) eta Barry Kerr Trio (azaroaren 25a) aipatu behar dira. FullSet Irlandako musika tradizionalaren egungo panoraman talentu eta moldakortasun handiena duten sei gazte musikarik osatu duten talde indartsu eta dibertigarria da. Barry Kerr Trio, berriz, Kerr anaia entzutetsuek eta Donogh Hennessy gitarra jotzaileak osatzen dute.

Aitzina Folk Jaialdi Solidarioaren XI. edizioko programazio anitz eta oparo hori Gasteizko kaleetan ere zabalduko da doako emanaldi batzuekin. Izan ere, azaroaren 11n, larunbata, hirigunean bederatzi bandek eskainitako kalejira egingo da.

 

ANTOLAKETA SOLIDARIOA ETA SARREREN SALMENTA

Aitzina Folk taldea Aitzina Lan Taldeak antolatzen du. 2010ean sortu zen, ataxia telangiektasia duten gaixoei eta haien familiei Euskal Autonomia Erkidegoan tokiko ikuspegitik laguntzeko, eta Estatuko Aefat erakundean sartuta dago. Jaialdia beste bi jaialdi ospetsurekin dago senidetuta: Cáceres Irish Fleadh eta Burgosko Babieca Folk. Azken urteotan zenbait artista partekatu dituzte jaialdi horiek.

Aurten, gainera, jaialdiko ordaindu beharreko kontzertu guztiak biltzen dituzten 50 abonamendu jarri dira salgai 125 euroko prezio berezian.  Abonamendu horiek eta banakako sarrerak (haien prezioak 6 euro eta 30 euro artekoak izango dira) jaialdiaren webgunean eros daitezke: www.aitzinafolk.org.

BABESLETZAK ETA ENPRESA LAGUNTZAILEAK

Aitzina Folkek honako hauen babesa du: Gasteizko Udala, Eusko Jaurlaritza, Arabako Foru Aldundia, Loramendi, Laboral Kutxa, Vital Fundazioa, Artium, Evento Kit, Principal Antzokia, Santa Maria Katedrala Fundazioa eta Izaskun Arrue Kulturgunea.

Bestalde, honako hauen laguntza ere jaso du jaialdiak: Ideolab, Radio Vitoria, Diario Noticias de Álava, Cadena SER, La Caixa, Hotel Boulevard, Bide-Bidean, Artepan, Eusko Label, Eukeni Txakoli, La Gistería, Jesus Guridi Musika Kontserbatorioa, Luis Aramburu Musika Eskola, Gasteizko Folklore Akademia, Jose Uruñuela Dantza Kontserbatorioa, Folk Eskola, Falerina Taberna eta Jaizki Fontaneda Fotografía.

Informazio gehiago