Maiatzaren 6tik 29ra bitartean, Kultura Etxeko erakusketa aretoak ateak irekiko dizkio "Gernika. Begiradak" erakusketari. Xanti Arrietaren proposamen artistikoa da, eta gerraren memoria, nortasuna eta ondorioak hurbiletik begiratzera gonbidatzen du.    

Erakusketa honetan, Arrietak Picassoren Gernikaren unibertso sinbolikoa zatitu, berrinterpretatu eta eguneratu du, eta Gernikako 1937ko bonbardaketa eta egungo gatazka eta bonbardaketak lotzen dituen ibilbide bat proposatu du.  Erakusketak hainbat teknika eta material erabili ditu –eskultura, pintura, argazkigintza, zeramika, esmaltea eta zura– indarkeriari, memoria kolektiboari eta egungo gatazken errealitateari buruz hausnartzeko espazio bat eskaintzeko.

Erakusketa proiektu kolektibo eta polifoniko gisa aurkezten da, Txema Ramírez de la Piscina kazetari, idazle eta ikertzaileak koordinatuta, eta euskal kulturaren erreferente nabarmenen testuak eta begiradak jasotzen ditu, hala nola hauexenak: Nerea Ibarzabal, Onintza Enbeita, Amets Arzallus, Kirmen Uribe, Castillo Suárez, Eñaut Elorrieta, Patxi Ibarzabal, Maite Aristegi eta Martxelo Otamendi.  

Erakusketaren abiapuntua ondoezak eta ezinegonak sortutako begirada da, eta gogorarazten du nola Gernika ezagunaren atzean dozenaka indarkeria agertoki dauden munduko hainbat tokitan. Hala, jendeari galdetzen dio ea zenbat ikasi den 1937tik eta ea zenbat "Gernika" gehiago jasan ditzaketen kontzientzia garaikideek.

"Gernika. Begiradak" erakusketak jendeari gonbit egiten dio murgiltzera historia, memoria eta indarkeriaren aurreko erantzukizun kolektiboa zalantzan jartzen dituen ibilbide artistiko batean, denbora gainditzen duen eta iragana eta oraina lotzen dituen gogoeta esperientzia bat eskainiz.